កំណាព្យ ទឹកចិត្តបងប្រុស
បទពាក្យ ៧
- ទឹកចិត្តបងប្រុសដូចពុកម៉ែ ចេះថ្នាក់ថ្នមថែប្អូនប្រុសស្រី ស្វែងរកអាហារនំចំនី ស្វែងរកអ្វីៗផ្គាប់ចិត្តប្អូន។
- ឲ្យតែប្អូនបានជួបសុខៈ មិនចេះអន់អាក់ចាត់ដូចកូន
រុកកាត់ព្រៃផ្សៃងងឹតសូន្យ ឆ្លងព្យុះទូកក្បូនមិនត្អូញហត់។ - ឃើញប្អូនធ្វើខុសខំតម្រង់ មិនចាំបង្អស់ប្រៀនហ្មត់ចត់
ប្រដៅដើរផ្លូវល្អប្រាកដ មិនខ្លាចនឿយហត់ ឬប្អូនខឹង។ - ពេលពុកទៅស្រែម៉ែមិននៅ គិតក្នុងគិតក្រៅព្យាយាមប្រឹង
ដាំបាយស្លរអាំងដុតស្ងោរឆឹង ឲ្យតែព្រលឹងប្អូនបានឆី។ - ប្អូនញ៉ាំឆ្អែតហើយគេងលក់អស់ មិននៅស្ងៀមសោះខំលកលៃ
រែកទឹកពុសអុសគក់ភួយស្បៃ លុះពេលរាត្រីចរមកដល់។ - ពេលយប់បងប្រុសមិនកណ្ដើយ ញ៉ាំបាយរួចហើយខំតំកល់
បង្រៀនប្អូនឲ្យចេះគ្មានសល់ វិជ្ជាថ្កើងថ្កល់ស្រស់ទងវង។ - ជួនមានថ្ងៃខ្លះពុកម៉ែថា បងប្រុសនេះណាខុសទំនង
បន្ទោសប្អូនក្មេងថាខុសឆ្គង ថាខុសទំនងគ្មានដើមចុង។ - ពេលខ្លះត្រូវប្អូនចោទបងថា ខុសក្បួនតម្រាចារទុកក្នុង
ពាក្យចាស់ពីព្រេងម្តេចលះបង់ ម្ដេចក៏បងល្ងង់លម្អៀងឆ្ងាយ។ - ទោះប្អូនចោទថាបងលម្អៀង តិចច្រើនមិនទៀងខុសពីម្ដាយ
ខុសពីច្បាប់ពុកមិនបរិយាយ ចិត្តបងមិនឆ្ងាយស្រលាញ់ប្អូន។និពន្ធដោយ យី ឆេងអ៊ួ ហៅ ប៉េង
បណ្ណារក្ស
ភ្នំពេញ 21-តុលា-2010
សមាគមសិក្សា 